Pou Tarāwaho Pūkenga Whai Mahi
Ko ngā "pūkenga ngāwari" he pūkenga whai mahi, kaha rānei e hiahiatia ana mō te mahi. Ko ngā mea pēnei i ngā whanonga, waiaro, whakapono me ngā pūmanawa whaiaro pēnei i te whakahaere-whaiaro me te whakawhirinaki. E kī mai ana ngā kaituku mahi o Aotearoa me tāwāhi he pūkenga waiwai ēnei mō te whiwhi mahi me te pupuri i tō mahi. Mō te kimi kaimahi, e kimihia ana e ngā kaituku mahi ko ngā pūkenga whai mahi i te taha i ngā tohu mātauranga, wheako mahi me ētahi atu pūkenga waiwai pēnei i te pānui me te tuhituhi, te tātai me te ICT.
He utauta te pou tarāwaho pūkenga Whai Mahi e whakaatu ana i ngā pūkenga whai mahi e tautuhia noatia ana e ngā kaituku mahi o Aotearoa mō ngā rangatahi katoa kia takatū, kia momoho ai rātau ki te mahi. He mea waihanga e te Advisory Pathways Group, he māngai kaituku mahi, kaiwhakaako, tari kāwanatanga, kaiwhakangungu ahumahi hoki. I takea mai te utauta mai i ngā mahi a te rāngai whānui e whakarato ana i ngā kaiārahi kura, kaiako, ākonga, whakahaere kura tuatoru, whakahaere ā-iwi me ngā kaituku mahi e mōhio ana he aha ngā pūkenga whai mahi. Mā te whai i tētahi reo tūhonohono hei whakaatu i ngā pūkenga whai mahi matua ka tautoko i te piki haere o te mōhio i waenga i ngā kaituku mahi, kaiwhakaako me ngā rangatahi hoki mō ngā mea e hiahiatia ana mai i ngā kaimahi kei te ohu mahi.
E wātea ana te rauemi nei i te reo Ingarihi me Te Reo Māori mā ngā ākonga, kaituku mahi me ngā kaiwhakaako. Ka hāngai te utauta nei ki ngā pou tarāwaho me ngā rangahau onāianei, tae atu ki te New Zealand Curriculum me Te Marautanga o Aotearoa. He mea waihanga me te whakamātautau e ngā kaiwhakamahi maha puta noa i Aotearoa, tae atu ki ngā ākonga, kaituku mahi, kaiako kura tuarua, ngā kaitohutohu umanga mahi, me ngā kaiwhakahaere kēhi mahi.
1. Waiaro pai
- He pai te wairua, ā, he whai waiaro "ka taea"
- He ngākau roroku tōna, he pono, he whakaaro nui
- He ngākau hari, whakahoahoa, tākare hoki
- He hīkaka ki te whai i ōna whāinga.
2. Whitiwhiti kōrero
- He mārama, he whakaaroaro ki te āhua o ana kōrero me te pānga ki ētahi atu.
- He uiui ki te kore ia e mōhio, e mārama rānei.
- He mārama he pēhea te whitiwhiti kōrero a ngā kaimahi, kaituku mahi, kiritaki hoki.
- He tika te kōrero, whakarongo me te whakaputa whakaaro.
3. Mahi ngātahi
- He pai te mahi me ētahi atu kia tutuki ai ngā mahi me ngā whāinga.
- He tuku whakaaro hei waihanga huatau hou, kaupapa rānei.
- He pai te mahi tahi me ētahi atu tāne/wāhine, ahurea, whakapono kē rānei.
- He mōhio ki te mana o ngā kaiārahi me ngā kaiwhakahaere, me te whai i ā rātau tohutohu.
4. Whakahaere-whaiaro
- He taetae atu ki te mahi i te wā tika, he mau kākahu tōtika, whai taputapu tika hoki e oti pai ai ngā mahi o ia rā.
- He mārama, he whakaaroaro hoki ki āna ake kupu, mahi, whanonga hoki me te pānga o ēnei ki ētahi atu.
- He pūmau, he whai kawenga.
- He pono ia, he whai i ngā tohutohu me te whakatutuki i ngā mahi i tohua.
- He whai kawenga mō tōna ake hauora, oranga hoki, me te whai i ngā aratohu hauora me te haumaru i te wāhi mahi.
5. He hiahia ki te ako
- He hiahia ki te ako mahi hou, pūkenga, kōrero hoki.
- He pākiki, tākare hoki ki te mahi, whakahaere, ahumahi hoki.
- He kimi i ngā huarahi e tōtika ake te mahi kia pai ake te pakihi.
- He ngākau tuwhera ki ngā tohutohu, ā, he ako mai i ngā whakahokinga kōrero mai.
6. Ngā pūkenga whakaaro (rapa rongoā me te tuku whakatau)
- He tautuhi me te tātari i ngā kōwhiringa i mua i te tuku whakatau.
- He mōhio ki ngā raruraru, ā, he wairua kakama tōna ki te rapa rongoā.
- He whakaaro mō ngā mutunga mai i mua i te mahi.
- He mōhio mō āhea rapu tohutohu ai.
7. Pakaritanga
- He urutau, he ngāwari hoki ki ngā āhuatanga hou, takahuri hoki.
- Ka taea noa ngā whakapātaritari me ngā whakararu, ā, kāore e mate wheke.
- Ka taea e ia te rapu tautoko, āwhina hoki ina hiahiatia ana.
- He mōhio, he āhukahuka i ngā hapa me ngā akoranga ka puta.